තාක්‍ෂණයේ දියුණුවත් සමඟ රාජ්‍ය පාලනය හා මහජනයා අතර වඩාත් සමීප සම්බන්ධතාවයක් ඇති කිරීමට මෙන්ම මනා කාර්යක්‍ෂමතාවයකින් යුතු ජනතා සේවයක් ඉටු කිරීමට තිහගොඩ ප්‍රාදේශීය සභාවේ වෙබ් අඩවිය සභාවේ නිලධාරීන්ට මෙන්ම පුරවැසි ජනතාවට ද සේවා අවශ්‍යතා ඉටුකර ගැනීමට හැකිවන අයුරින් ආරම්භ කිරීමට හැකි වීම පිළිබඳව මා ඉමහත් සතුටට පත් වෙමි.

පුරවැසි ජනතාවට වරිපනම් බදු ගෙවීම, නොපවරා ගැනීමේ සහතික ලබා ගැනීම, ගොඩනැගිලි සැලසුම් අනුමත කිරීම, අනුකූලතා සහතික ලබා ගැනීම, අනුබෙදුම් අයදුම්පත් අනුමත කිරීම සහ සභාවෙන් ලැබිය යුතු සේවාවන් සඳහා අයදුම්පත් බාගත කිරීම, මාර්ගගතව පැමිණිලි යොමු කිරීම,අදාළ සේවාවන් සිදු කර ගැනීමේ ක්‍රියාපටිපාටිය ගැලීම් සටහන් මගින් විස්තරාත්මකව සපයා ගැනීමට ද මෙම වෙබ් අඩවිය මගින් පහසුකම් සලසා දී ඇත.

තිහගොඩ ප්‍රාදේශීය සභාව මඟින් සපයන සේවාවන් ලබා ගැනීමට කාර්යාලය වෙත පැමිණිම වෙනුවට e – තාක්ෂණය මගින් අවශ්‍ය සියළුම සේවාවන් තම නිවසේ සිට ලබා ගනිමින් ප්‍රාදේශීය සභාව ගමට ගෙන යන වැඩසටහන මේ වන විට ආරම්භ කර ඇත. ඒ තුලින් ජනතාවට ශ්‍රමය, ධනය හා කාලය ඉතිරි කර ගනිමින් ඉතා කඩිනමින් සේවාවන් ලබා දීමට තිහගොඩ ප්‍රාදේශීය සභාව ජනතාවට සමීතම රාජ්‍යය ආයතනය වශයෙන් අප, වර්තමාන හා අනාගත පරපුරට සරිලන ආකාරයෙන් තිරසාර ලෙස සෑම පැතිකඩකින්ම විශිෂ්ඨ තත්වයට පත්වීම සඳහා තිහගොඩ ප්‍රාදේශීය සභාව නියෝජනය කරන දේශපාලන නායකත්වය හා මා සමඟ මාගේ සමස්ථ කාර්ය මණ්ඩලය සෑම විටම කැප වී කටයුතු කරන බව සතුටින් ප්‍රකාශ කරමි.
පළාත් පාලන ආයතනයක් තුලින් ජනතාවට ඉටුවිය යුතු සියළුම කාර්ය කර්තව්‍යයන් නිසි ලෙස කාර්යක්ෂමව හා ඵලදායීව ඉටු කිරීමෙන් ඉදිරි වර්ෂයන් තුල දිවයිනේ විශිෂ්ඨතම පළාත් පාලන ආයතනයක් ලෙස පත් වෙමින්, තිහගොඩ ප්‍රාදේශීය සභාව මඟින් කුමන හෝ සේවාවක් අපේක්ෂා කරන තිහගොඩ ප්‍රාදේශීය සභා බල ප්‍රදේශයේ සහෝදර ජනතාවට මෙන්ම තිහගොඩ සභා බල ප්‍රදේශයට දිනපතා පැමිණෙන දහස් ගණනක් වන ජනතාවටත් සෞඛ්‍ය සම්පන්න, පොදු පහසුකම් වලින් පුර්ණ සුවදායි පරිසරයක් නිර්මාණය කිරිමේ අපේක්ෂා මල්ඵල ගැන්වීමට මා සමඟ අපගේ සමස්ථ කාර්ය මණ්ඩලය කැපවී කටයුතු කිරීමේදී එම ඉලක්ක සපුරා ගැනිමට තිහගොඩ ප්‍රාදේශීය සභාව සමග සෑම කාර්යයකදීම අදහස්, යෝජනා හා චෝදනා ඉදිරිපත් කරමින් අප සමග එක්ව කටයුතු කිරීමට ඔබට ගෞරවයෙන් ආරාධනා කරමි.

එම්.ටී.එච්.ජී.නිහාරි
ලේකම්
තිහගොඩ ප්‍රාදේශීය සභාව